اطباق مختلفة لورق العنب

ورق عنب بالزيت

المقادير:
كوب رز مصري شدتين بقدونس
1/2 كيلو طماطم عدد 3بصل نصف شدة نعنع
بهارات وفلفل اسود وملح نص كوب زيت زيتون كوب ليمون
2 مرطبان ورق عنب
عدد 3 حبات بطاطا مقطعة شرحات سميكة
عدد 3 حبات طماطم مقطعة شرحات سميكة
عدد 3 حبات بصل مقطعة شرحات سميكة
عدد 4 فلفل حار
هذه الشرائح مع الفلفل توضح في أسفل الطنجرة
الطريقة:
- ينقع الرز لمده نصف ساعه تقريبا قبل البدء بالحشو
- تفرم الطماطم والبصل والبقدونس والنعنع فرما ناعما وتضاف اليها القليل من الزيت الزيتون والليمون والبهارات جميعها وتخلط جيدا ثم يوضع الرز المغسول جيدا ويخلط مع الحشو السابق
- يغلي ماء ويوضع به الورق عنب حتي يذوب قليلا ثم يصفي ثم نبدأ بعملية لف الورق العنب نأخذ كل ورقة ونضع بداخلها القليل من الحشوة وتصف داخل الطنجرة التي وضعنا في أسفلها الطماطم والبطاطا والبصل وتلفين كل الكمية الموجودة وعند الإنتهاء من لف الورق العنب نضع تقريبا كوبين من عصي الليمون وكوب من الزيت ثم نضع صحن كبير على وجه الورق عنب لكي ( يكبسهم ) ونضعهم على النار قرابة 3 إلى 4 ساعات أو أكثر حتى تنضج ثم يترك في القدر حتي يبرد ثم يقلب ويقدم بارد.
والف صحتين وعافية

ورق عنب بقدر الضغط ..دقايق وهو مستوي

المقادير:
عبوة ورق عنب (اريح من الطازج ) اغسليه جيدا من الملح
ثم ضعي عليه ماء حار لحين الانتهاء من اعداد الحشوه)
كاستين رز مصري مسلوق بالماء والملح وشوي زيت لمدة 10دقايق
بصلتين كبار مفرومه مع فصين ثوم حبت طماطم مقطعه مربعات صغيره
حزمه كزبره خضراء+نص حزمه نعناع حساوي(الحبق)+حزمه نعناع
مغربي (يفضل ناشف)+ربع حزمه بقدونس (كلها مفرومه)
ملعقه ملح عادي+ملعقه صغيره ملح ليمون+ملعقه كبيره جيني موتو
(او الماجي الابيض هو اللي يعطي حذاقه)
زيت زيتون وليمون عادي
ملعقه كبيره سماق مهم يعطيه طعم ولون احمر
بطاطس مقطعه شرايح رقيقه دائريه
الطريقه
علي النار ضعي قدر فيه زيت (عافيه) وضعي عليه البصل والثوم حتي تذبل
ثم ضعي الطماطم وحركيها شوي ثم ضعي الرز بعد (ماتصفينه زين)
حركيه قليلا ثم اطفئي النار وضعي عليها الاشياء الخضراء...
واضيفي الملح وملح الليمون والجيني موتو وملعقة السماق
وضعي زيت الزيتون وعصير ليمونه وحده كفايه
ابدئ بلف ورق العنب كالعاده اكيد تعرفون
جيبي قدر الضغط ورصي شرايح البطاطس في قاعه ثم رصي حبات
ورق العنب جنب بعض رشي عليها زيت زيتون وحطيها علي النار خمس
دقايق ثم ضعي في كوب(كوب الجبن الكبيره فقط)ماء حار
وملعقة جيني موتو او نص حبة ماجي صبيها علي ورق العنب ..ثم ضعي صحن عليه
واحكمي اغلاق القدر تسمعين صوت الصفاره بعد 10دقايق وطي
بالنار خليها وسط لمدة نصف ساعه فقط ثم اطفئ النار ولا تفتحيه
الا بعد ربع ساعه..
ذوقي الطعم وادعيلي...اذا تبغينه حاذق اكثر زودي ملح الليمون شوي

ورق العنب والحشوه في الفريزر

اليوم بقولكم طريقة ورق العنب مالتي اللي سالتني عنها جم عضوة واللي كلمن ذاقها مدحها
اللي علمنياها وحده مصريه الله يذكرها بالخير بس انا غيرت فيها واجد واضفت لمساتي وصرت احط زيت زيتون بدال السمن وغيرت مكونات واجد وصدقوني بدون مبالغه لذيذه وتصلح للتقديم كمقبلات وحاره كطبق ساخن
اول شي بقولكم خلطتي وميزة هالخلطة انها تنحط بالفريزر حتى لو شهر ولو تنطبخ مايتغير طعمها وهذي ميزتها تريحكم وتوفر وقت لان ورق العنب متعب
وعلى فكره توني سويتها عشان اعرف المقادير لاني قبل ماالتزم بمقادير بس علشانكم وعشان اكتبها لكم بس لاتخترعون من كثرة المكونات لانها تكفي من 3 الى 4 طبخات
مقادير الحشوه ( تنحط في الفريزر او تتسوى على طول ) :
- 15 طماطه كبيره بالخلاط ناعم
- 10 بصلات بالخلاط ناعم ( السر في كثرة البصل )
- 16 مكعب ماجي ( هو اللي يحلي الطبخه وهذا السر لاني ماحط ملح كلش )
- 2 كرتونة او علبة صلصة طماط ( كي ديدي او السعوديه او اي ماركه حلوه لونها احمر )
- تقريبا 2 قلاص زيت زيتون او اكثر او اقل حسب الرغبه ( انا احبه لانه يعطي طعم رهيب )
- ملعقة كبيره ونص كمون ناعم
- ملعقه كبيره فلفل اسود او حسب الرغبه
- ممكن تضيفين فصين ثوم بس انا مااضيفه دايما ( اليوم ماضفته )
- عصير 3 ليمونات او اكثر حسب الرغبه
الطريقة :
- في جدر كبير نصب زيت الزيتون ونضيف عليه البصل ونقلب فيه تقريبا دقيقتين على نار متوسطه( يفضل ان زيت الزيتون يكون اكثر من البصل عشان مايحترق البصل)
- نضيف الطماط وباقي المكونات ونقلب فيه تقريبا 10 دقايق او اقل او لين ينضج الطماط على نار متوسطه لين يذوب الطماط لكن لاتخلينه ينشف ديري بالج
الحين انتهت الحشوه خليها تبرد وقسميها في علب تتسكر وتنحط بالفريزر ( تقريبا تكفي 3 او 4 طبخات مع العلم ان كل طبخة تحتاج 2 قلاص رز صنوايت ولازم الحشوه تكون اكثر من الرز )
ملاحظه :
لاتضيفين الرز نهائيا حطيها بالفريزر وخلاص
قبل الاستخدام طلعيها لين تذوب وطبعا اذا بتسوين طبخه قبل الفريزر كيفج
مقادير ورق العنب :
- علبة ورق عنب
- 2 قلاص رز صنوايت
- شدة بقدونس كبيره مفرومه وشدة كزبره خضره كبيره مفرومه و شدتين شبنت كبيره مفرومه ( والله مايحلي المحاشي وورق العنب غير الشبنت )
- تقريبا قلاص زيت زيتون
- تقريبا عصير 2 ليمونه او 2 ملعقه كبيره دبس الرمان
-مكعبين ماجي
-ماي للطبخ
طريقة ورق العنب :
1- ناخذ الحشوه سواء المذابه او الطازجه ونحطها في مصفاة تقريبا نص ساعه وكل شوي نقلبها عشان ينزل الماي لان كثرة الماي يخرب ورق العنب وعشان استفيد من الماي بالطبخ
2- في جدر نحط 2 قلاص رز صنوايت ونضيف عليه الحشوه بحيث تكون اكثر منه
3- نحط شدة بقدونس كبيره مفرومه وشدة كزبره خضره كبيره مفرومه و شدتين شبنت كبيره مفرومه ونحرك كل المكونات في ملعقه شوي شوي عشان الرز مايتكسر
ملاحظه :
اذا كنتي مستعجله وتبينه بسرعه يخلص ممكن تحطين الحشوه على النار قبل لاتحطين الحشوة في مصفاة لين تنضج الحبة نص نضجه
4- نحشي ورق العنب بالطريقه العاديه ونرصه في جدر فوق شرايح بطاط
5- بعد مانخلص اللف نصب تقريبا قلاص زيت زيتون او اكثر او اقل حسب الرغبه
6- نضيف عصير 2 ليمونه او 2 ملعقه كبيره دبس رمان حسب الرغبه فوق الماي اللي صفيناه اول شي مع حبتين او حبة ماجي حسب الرغبه ونغليه غلوه وحده على النار عشان يذوب الماجي ونصبه فوق ورق العنب
7- نغطي بغطا جدر اصغر ونحط فوقه ثقل ونحطه على نار عاليه لين يغلي
8- نشيل الثقل ونغطي الجدر بالقصدير ونحطه بالفرن على نار هاديه من ساعه الى ساعتين
ملاحظات :
- لاتكثرين الماي خليه فوق مستوى ورق العنب بشوي
- ممكن تسوين فيه الكرنب والمحشي بس ضيفي مع ماي الطبخ نص كرتونة صلصة طماط او كرتونة اذا جدرج كبير وحطي زيت ذره فوق المحشي بدال زيت الزيتون او حطي سمنه
بنات امانه عليكم سووها وادعولي لان هالوصفه اعتبرها سر وماكنت اعطيها لاي وحده لاني ماكنت اعرف المقادير بالضبط ولان مو اي وحده تستاهل
بالعافيه مقدما